رپورٹ،سید ممتاز شیرازی، بیوروہیڈفیصل آباد(Prime news, UAE)ڈائریکٹر جنرل ایف ڈی اے محمد آصف چوہدری کی ہدایات پر ایف ڈی اے کی اینٹی انکروچمنٹ ٹیم نے گلبرگ اور لکڑ منڈی روڈ پر گرینڈ آپریشن کرتے ہوئے متعدد پختہ و عارضی تجاوزات کا خاتمہ کر دیا۔ یہ آپریشن رات گئے تک جاری رہا جس کے دوران تجاوزات میں استعمال ہونے والا کاروباری سامان قبضے میں لے لیا گیا جبکہ 50 سے زائد دکانداروں اور ریڑھی بانوں کے خلاف چالان مرتب کرکے اسپیشل جوڈیشل مجسٹریٹ کی عدالت میں بھجوا دیے گئے۔تفصیلات کے مطابق ڈائریکٹر جنرل ایف ڈی اے نے عوامی شکایات کا فوری نوٹس لیتے ہوئے ٹریفک کی روانی میں حائل رکاوٹوں اور عوامی گزرگاہوں پر غیر قانونی قبضوں بلاتاخیر ختم کرنے کا حکم دیا جس پر عمل کرتے ہوئے ڈائریکٹر اسٹیٹ مینجمنٹ ون جنید حسن منج کی زیرِ نگرانی اسٹیٹ آفیسر فاران ہاشمی کی سربراہی میں انسپکٹر اسلم انصاری و دیگر سٹاف پر مشتمل ایف ڈی اے کی اینٹی انکروچمنٹ ٹیم نے بھاری مشینری کے ہمراہ گرینڈ آپریشن کیا۔ اس دوران کھانے پینے کی اشیاء و پھل فروشوں اور دیگر دکانداروں کی طرف سے سڑکوں، فٹ پاتھوں اور دیگر عوامی مقامات پر قائم غیر قانونی تجاوزات ختم کر دی گئیں جبکہ تجاوزات میں استعمال ہونے والا سامان قبضے میں لے لیا گیا تاکہ سرکاری اراضی کو واگزار کرایا جا سکے اور شہریوں کو آمدورفت میں درپیش مشکلات کا خاتمہ ممکن بنایا جا سکے۔ ڈائریکٹر جنرل ایف ڈی اے محمد آصف چوہدری نے کہا کہ عوامی مفاد، ٹریفک کی روانی اور شہریوں کو محفوظ و سہل آمدورفت کی فراہمی ایف ڈی اے کی اولین ترجیح ہے۔ انہوں نے واضح کیا کہ سرکاری اراضی پر کسی بھی قسم کا غیر قانونی قبضہ یا تجاوز ہرگز برداشت نہیں کیا جائے گا اور تجاوزات کے خلاف بلاامتیاز کارروائیاں مستقل بنیادوں پر جاری رہیں گی۔ انہوں نے دکانداروں سے کہا کہ وہ رضاکارانہ طور پر سڑکوں، فٹ پاتھوں اور دیگر عوامی مقامات پر قائم تجاوزات ختم کریں اور قانون کی پاسداری کو یقینی بنائیں بصورت دیگر سامان کی ضبطی، جرمانوں اور قانونی کارروائی سمیت سخت اقدامات عمل میں لائے جائیں گے۔۔۔۔///۔۔۔

By Prime NewsJuly 8, 2026No Comments1 Min Read